२० असार, २०८२काठमाडौं । अन्नपूर्ण भेजिटेबल प्रडक्ट्स प्रालिले १० महिनामा साढे ९ अर्ब रुपैयाँको व्यापार गरेको छ । कम्पनीले चालु आर्थिक वर्ष २०८१/८२ को १० महिना (सन् २०२५)मा ९ अर्ब ५७ करोड रुपैयाँको व्यापार गरेको हो । कम्पनीले दुई आर्थिक वर्ष बराबरको व्यापार एकै वर्ष गरेको हो ।
कम्पनीले सन् २०२४ मा ३ अर्ब ७४ करोड ५० लाख रुपैयाँ र सन् २०२३ मा ६ अर्ब ९८ करोड ८० लाख रुपैयाँ बराबरको व्यवसाय गरेको थियो । कम्पनीले सन् २०२२ मा भने १२ अर्ब ६५ करोड ३० लाख रुपैयाँ बराबरको सञ्चालन आम्दानी गरेको थियो ।
भारत सरकारले खाद्य तेल तथा कच्चा तेलको आयातमा गरेको कडाइका कारण कम्पनीको आम्दानीमा असर परेको जनाएको छ । सन् २०२४ मा आम्दानीमा गिरावट आएपनि चालु आवमा भने सुधार भएको छ ।
यद्यपी भारतले सन् २०२४ सेप्टेम्बरमा कच्चा र प्रशोधित सूर्यमुखी तेलमा भन्सार शुल्क क्रमशः २० प्रतिशत र ३२.५ प्रतिशत बढाएको हुँदा प्रशोधित तेल निर्यात बढ्ने अपेक्षा कम्पनीले गरेको छ । जसले गर्दा चालु आवको १० महिनामा कम्पनीले ६१ करोड ३० लाख रुपैयाँ गरेको छ ।
कम्पनीले सन् २०२१ मा ११ अर्ब ७ करोड ९० लाख रुपैयाँ, सन् २०२० मा ६ अर्ब ९७ करोड ४० लाख रुपैयाँको व्यापार गरेको थियो ।
सन् १९८८ मा त्रिवेणी ग्रुपले स्थापना गरेको अन्नपूर्ण भेजिटेबल प्रडक्ट्स विभिन्न प्रकारका तेल प्रशोधन गरी आन्तरिक बजारमा बिक्रीसँगै निर्यात पनि गर्दै आएको छ । २५ वर्षभन्दा बढी समयदेखि सञ्चालनमा रहेको यस उद्योगको प्लान्ट वीरगञ्जमा रहेको छ । प्लान्टबाट कम्पनीले खाद्य तेलहरूको प्रशोधन गर्ने काम गर्छ ।
कम्पनीले वार्षिक ६० हजार मेट्रिक टन सोयाबीन, पामोलियन, सूर्यमुखी तेल, ७ हजार मेट्रिक टन वनस्पति घिउ र १० हजार मेट्रिक टन तोरीको तेल प्रशोधन गरी घरेलु बजारमा अमृत, सनस्टार र रानी जस्ता ३ फरक ब्रान्डमा बिक्री वितरण गर्दै आएको छ । कम्पनीले दक्षिण अमेरिका, मलेसिया, इन्डोनेसिया, युक्रेन, क्यानाडा, अष्ट्रेलिया र भारतबाट कच्चा पदार्थ आयात गर्दै आएको छ ।
कम्पनीले ४ अर्ब १९ करोड ७२ लाख रुपैयाँ ऋणका लागि रेटिङ गराएको छ । केयर रेटिङ नेपालले ३ अर्ब १० करोड रुपैयाँ अल्पकालिन बैंक ऋणका लागि ए फोर रेटिङ प्रदान गरेको छ । यस्तै, १ अर्ब ९ करोड ७२ लाख रुपैयाँ दीर्घकालिन ऋणका लागि डबल बी माइनस रेटिङ पाएको छ ।
