काठमाडौं । काठमाडौं महानगरपालिकाले आफ्नो क्षेत्राधिकारभित्र सञ्चालित सहकारी संस्थाहरुलाई आर्थिक वर्ष सम्पन्न भएको ३ महिनाभित्र अद्यावधिक विवरण पेस गर्न निर्देशन दिएको छ।

महानगरपालिकाले आइतबार सबै सहकारीका नाममा परिपत्र जारी गर्दै यस्तो निर्देशन दिएको हो। तोकिएका अध्यावधिक विवरण पेस गर्न महानगरपालिकाले निर्देशन दिएको छ।

महानगरपालिकाभित्र सञ्चालित सहकारीले कारोबारको चौमासिक र वार्षिक प्रतिवेदन तथा लेखापरीक्षण प्रतिवेदन, वार्षिक कार्यकम नीति तथा योजना, खुद बचतसम्बन्धी नीति तथा योजना, सञ्चालकको नाम तथा बाँकी कार्यावधिको सूची, साधारणसभाको बैठकसम्बन्धी जानकारी, शेयर सदस्य संख्या, शेयरपुँजी र कुल बचत तथा कर्जाको विवरण पेस गर्नुपर्नेछ।

यसैगरी सञ्चालक वा सदस्यले लिएको ऋण तिर्न बाँकी रहेको रकम र बचत फिर्ता माग गर्ने बचतकर्ताहरुको विवरण पनि पेस गर्न महानगरपालिकाले निर्देशन दिएको छ।