काठमाडौं । नेपाल क्रिकेट संघले राष्ट्रिय क्रिकेट टोलीका खेलाडीको कोरोना बीमा गरिने भएको छ । नेपाल क्रिकेट संघ (क्यान)ले खेलाडीको कोरोना बीमा गर्न लागेको जनाएको छ ।
राजधानीलगायत देशैभरी कोरोना भाइरसको संक्रमण दिनप्रतिदिन बढ्दै गएको र त्यसले महामारीको स्वरुप लिँदै गर्दा क्यानले राष्ट्रिय टोलीमा रहेका पुरुष खेलाडीको कोरोना बीमा गर्ने निर्णय गरेको हो । क्यानका सचिव अशोकनाथ प्याकुरेलका अनुसार खेलाडी तथा कर्मचारीहरुको कोरोना बीमा गर्ने सम्बन्धमा छलफल भइरहेको छ । क्यानले अग्रभागमा काम गर्ने कर्मचारीको समेत क्यानले कोरोना बीमा गर्ने जनाएको छ । ‘सरकारको निषेधाज्ञाको घोषणाले बीमा गर्न ढिलाइ हुनसक्छ’, प्याकुरेलले भने । तर, सबै बीमा कम्पनीहरुले न्यूनतम कार्यालय सञ्चालन गरेकाले जुनसुकै कम्पनीमार्फत क्यानले आफ्ना खेलाडी तथा कर्मचारीहरुको कोरोना बीमा गर्न सक्नेछ ।