काठमाडौं । दुबईबाट तेल अभिभ जाँदै गरेको फ्लाई दुबईको यात्रुवाहक विमानलाई बुधबार बिहान अचानक साउदी अरेबियामा डाइभर्ट गरी अवतरण गरिएको छ।

इजरायली मिडियाका अनुसार उडानका क्रममा पाइलट र सहपाइलटबीच झगडा भएको थियो। त्यसपछि विमानले आपतकालीन संकेत पठाएको थियो। जसले गर्दा अपहरणको डर बढेको थियो।

उडान एफजेड–१०७३ संयुक्त अरब इमिरेट्सको दुबई अन्तर्राष्ट्रिय विमानस्थलबाट उडान भरेको थियो। यसमा लगभग १५० देखि १८० जना सवार थिए। जसमा धेरैजसो इजरायली नागरिक थिए।

उडान ट्रयाकिङ वेबसाइट फ्लाइटराडर२४ का अनुसार उडान भरेको लगभग दुई घन्टापछि विमानले पहिलो पटक ७७०० को स्क्वाक कोड पठाएको थियो। यो एउटा मानक आपतकालीन संकेत हो। केही मिनेटपछि यसले ७५०० को कोड पठाएको थियो। जसले विमानमा अनधिकृत हस्तक्षेप वा अपहरणलाई संकेत गर्दछ। त्यसपछि विमानले दोस्रो ७७०० पठाएको थियो।

फ्लाइटराडर२४ को तथ्यांकअनुसार विमानले अचानक साउदी अरेबियामाथि मार्ग परिवर्तन गर्यो र द्रुत रुपमा ओरालो लाग्न थाल्यो। दुई मिनेटभन्दा कम समयमा विमान १७ हजार फिट (५ हजार मिटर) भन्दा बढी तल ओर्लिएको थियो।

त्यसपछि विमानले लगभग सात मिनेटका लागि आपतकालीन संकेत जारी गर्यो। स्थानीय समयअनुसार बिहान ५ः४० बजे उडान छोटो समयका लागि जोर्डनको हवाई क्षेत्रमा प्रवेश गर्यो। केही मिनेटपछि यो साउदी अरेबियातिर फर्कियो र अवतरण गर्न थाल्यो।

विमान तेल अभिभको बेन गुरियन विमानस्थलमा अवतरण गर्ने तालिका थियो। तर, उत्तरपूर्वी साउदी अरेबियाको ताबुक विमानस्थलमा अवतरण भयो।

यात्रुहरुले स्थानीय मिडियालाई विमान ओरालो लाग्न थालेपछि आफ्नो ज्यानको खतरा रहेको बताए। इजरायली एक अधिकारीले नाम न छाप्ने सर्तमा रोयटर्ससँग कुरा गर्दै भने, ‘दुवै पाइलटले झगडापछि आपतकालीन संकेत पठाएका थिए। यद्यपि, दुवै पाइलटले जानाजानी आपतकालीन संकेत पठाएको हो कि होइन भन्ने कुरा तुरुन्तै स्पष्ट भएन।’

इजरायली प्रसारक एन१२ समाचारका प्रमुख राजनीतिक विश्लेषक अमित सेगलले एक्समा लेखे कि उडानका क्रममा दुई पाइलट झगडा भएको देखिन्छ। जसले गर्दा मध्यपूर्वमा उच्च सतर्कता जारी गरिएको थियो।

आफ्नो टिप्पणी पुनः पोस्ट गर्दै इजरायलका लागि अमेरिकी राजदूत माइक हकाबीले घटनाले मध्यपूर्वभरका नागरिक र सुरक्षा एजेन्सीलाई उच्च सतर्कतामा राखेको बताए। उनले भने, ‘यो भाग्यवश हो कि स्थिति अझ बढेन।’

जेरुसेलम पोस्टका अनुसार,इजरायली वायुसेनाले सम्भावित आपतकालको तयारीमा आफ्नो सतर्कता स्तर बढाएको थियो। इजरायली प्रधानमन्त्री कार्यालयले घटनालाई अपहरण नमानिएको उल्लेख गरेको छ।

यसअघि तीन इजरायली सुरक्षा अधिकारीले रोयटर्सलाई बताए कि प्रधानमन्त्री बेन्जामिन नेतान्याहुले अधिकारीहरुसँग उडानका बारेमा छलफल गरेका थिए। इजरायली सेनाले एक विज्ञप्तिमा सेना प्रमुख आयल जामिरले वायुसेना कमान्डर र अन्य सैन्य अधिकारीहरुसँग स्थितिको मूल्यांकन गरेको जनाएको छ।

फ्लाईदुबईका प्रवक्ताले पुष्टि गरे कि उडान ‘बाटोमा घटनाको सामना गर्यो । ‘हाम्रा टोलीले सम्बन्धित अधिकारीहरुसँग नजिकबाट काम गरिरहेका छन्’, प्रवक्ताले भने।

फ्लाईदुबईले दुबई र तेल अभिभबीच दैनिक उडानहरु सञ्चालन गर्दछ। यो मार्ग इजरायली नागरिकमाझ धेरै लोकप्रिय छ। –एजेन्सी