काठमाडौं । छिमेकी राष्ट्र भारतले राष्ट्रिय स्वतन्त्र पार्टी (रास्वपा)का शीर्ष नेताहरूलाई बधाई दिँदै आगामी सरकारसँग सहकार्य गर्ने प्रतिबद्धता जनाएको छ।

भारतीय प्रधानमन्त्री नरेन्द्र मोदीले टेलिफोन संवाद गर्दै दुबै शीर्ष नेताहरूलाई बधाई दिएका छन्।

मोदीले सामाजिक सञ्जाल एक्समा लेखेका छन्,”राष्ट्रिय स्वतन्त्र पार्टीका सभापति श्री रवि लामिछाने र वरिष्ठ नेता श्री बालेन्द्र शाहसँग हार्दिक टेलिफोन संवाद भयो। निर्वाचनमा उहाँहरूको व्यक्तिगत जित र रास्वपाको शानदार सफलताका लागि बधाई ज्ञापन गरियो। आगामी नयाँ सरकारलाई शुभकामना दिँदै दुई देशको आपसी समृद्धि, प्रगति र हितका लागि भारत सहकार्य गर्न प्रतिबद्ध रहेको जानकारी गराइयो। हाम्रो संयुक्त प्रयासले भारत-नेपाल सम्बन्ध आगामी वर्षहरूमा नयाँ उचाइमा पुग्नेमा म विश्वस्त छु।”

रास्वपाको ऐतिहासिक जित र सिट संख्या

भर्खरै सम्पन्न निर्वाचनको परिणाम अनुसार, रास्वपाले प्रत्यक्ष तर्फ १२४ सिट जित्दै प्रतिनिधि सभामा सबैभन्दा ठूलो दल बनेको छ। यो जित नेपालको लोकतान्त्रिक इतिहासकै सबैभन्दा ठूलो बहुमत मानिएको छ।

पार्टी सभापति रवि लामिछाने र वरिष्ठ नेता बालेन शाह (बालेन्द्र शाह) को संयुक्त नेतृत्वमा रास्वपाले पुरानो राजनीतिक शक्तिहरूलाई निकै पछाडि पारेको छ।

बालेन शाहले झापा क्षेत्र नं. ५ मा पूर्व प्रधानमन्त्री केपी शर्मा ओलीलाई भारी मत अन्तरले पराजित गर्दै राष्ट्रिय राजनीतिमा आफ्नो बलियो उपस्थिति जनाएका छन्।

रास्वपाको यो अभूतपूर्व सफलतापछि भारतीय उच्च नेतृत्वबाट बधाई सन्देश प्राप्त भएको छ। भारतीय पक्षले रवि लामिछाने र बालेन शाहसँग टेलिफोन वार्ता गर्दै नयाँ सरकारको सफलताको कामना गरेको छ।

यो चुनावमा रास्वपाले समानुपातिकतर्फ पनि उल्लेख्य मत प्राप्त गरेको छ। युवा पुस्ताको व्यापक समर्थन र ‘जेन-जी’ (Gen Z) आन्दोलनको प्रभावका कारण रास्वपा अब देशको नेतृत्व गर्ने तयारीमा जुटेको छ। बालेन शाहलाई भावी प्रधानमन्त्रीको रूपमा हेरिएको छ। रवि लामिछानेले पार्टीको संगठन र आगामी सरकारको नीति निर्माणमा मुख्य भूमिका खेल्ने देखिएको छ।