काठमाडौं । गभर्नर डा विश्वनाथ पौडेल जुन २७ देखि २९ सम्म स्विट्जरल्यान्डको बासेलमा आयोजित बैंक फर इन्टरनेसनल सेटलमेन्ट्स (बीआईएस)को ९५ औँ वार्षिक बैठकमा सहभागी भएका छन्।

सन् १९३० मा स्थापित बीआईएस एउटा अन्तर्राष्ट्रिय वित्तीय संस्था हो। यसमा हाल ६३ वटा केन्द्रीय बैंक सदस्य छन्।

विश्वभर मौद्रिक र वित्तीय स्थायित्व कायम राख्ने उद्देश्यले स्थापित संस्थाले केन्द्रीय बैंकहरुबीचको सहकार्य र वित्तीय प्रणालीको विकास एवं वित्तीय स्थायित्व कायम राख्नका लागि महत्वपूर्ण भूमिका निर्वाह गर्दै आएको छ। बैठकमा बीआईएस सदस्य राष्ट्र एवं विश्वका विभिन्न देशका केन्द्रीय बैंकका गभर्नर एवं उच्च अधिकारीको सहभागिता थियो।

बैठकका क्रममा गभर्नर पौडेल ‘सीपीएमआई इमर्जिङ मार्केट्स एन्ड डेभलपिङ इकोनोमिज–ब्रिडिङ ग्याप्सः फाइनान्सियल इन्क्लुजन, रिजनल इन्टिग्रेसन एन्ड क्रस बोर्डर पेमेन्ट्स’ तथा ‘बीआईएस इनोभेसन हब सेमिनारः एआई एन्ड सेफ्टी’ विषयक अन्तर्क्रियामा सहभागी भए। कार्यक्रममा अन्तरदेशीय भुक्तानी प्रणालीमा केन्द्रीय बैंकहरुले गरेका उपलब्धि र सामना गर्नुपरेको चुनौती तथा केन्द्रीय बैंकमा कृत्रिम बौद्धिकता (एआई)को प्रयोग र यसले बैकिङ प्रणालीमा ल्याउन सक्ने चुनौती र त्यसलाई सम्बोधन गर्न केन्द्रीय बैंकहरुले अवलम्बन गर्नुपर्ने नीतिगत व्यवस्थाका सम्बन्धमा छलफल भएको थियो। यसका साथै गभर्नर पौडेलले ‘रेगुलेसन एन्ड कम्पिटिटिभनेस’ विषयक अन्तर्क्रियामा समेत सहभागिता जनाएका थिए।

वार्षिक बैठकमा बीआईएसका महाप्रबन्धक अगस्टिन कार्सटेन्सले वार्षिक प्रतिवेदन सार्वजनिक गरेका थिए भने प्राध्यापक माउराइस अब्टफेल्डले ‘दि इन्टरनेसल मोनिटरी सिस्टमः ए फोर्क इन दि रोड’ विषयमा कार्यपत्र प्रस्तुत गरेका थिए।

बैठकका क्रममा गभर्नर पौडेलले बीआईएसका महाप्रबन्धक अगस्टिन कार्सटेन्ससँग भेटघाट गरेका थिए। साथै, बीआइएसको बैंकिङ विभागका प्रमुख लुइस बेङगोचाको नेतृत्वमा उक्त विभागका उच्च अधिकारीहरुलगायतका प्रतिनिधिसँग समेत बैठक गरेका थिए।

बैठकमा विदेशी विनिमय सञ्चिति लगानी विविधीकरणका लागि सुन खरिद तथा विश्वबजारमा उपलब्ध नयाँ नया उपकरणहरुमा लगानी गरी विदेशी विनिमय सञ्चिति व्यवस्थापनबाट प्राप्त हुने प्रतिफल बढाउन नेपाल राष्ट्र बैंकसँग हुन सक्ने सहकार्य लगायतका विषयहरुमा छलफल भएको थियो। साथै, विदेशी विनिमय सञ्चितिलाई सुरक्षित, लाभदायक र प्रभावकारी व्यवस्थापन गर्न थप लगानीको अवसरका लागि आवश्यक सहकार्य गर्ने विषयमा समेत छलफल भएको थियो।

उक्त वार्षिक बैठकका क्रममा गभर्नर पौडेल र भारतीय रिजर्भ बैंकका गभर्नर सञ्जय मल्होत्राबीच भेटघाट भएको थियो। भेटमा दुई केन्द्रीय बैंकबीचको आपसी सम्बन्ध थप विस्तार गर्ने र आगामी दिनमा समेत दुई केन्द्रीय बैंकबीच द्विपक्षीय सहकार्य अभिवृद्धि गर्ने, भुक्तानी प्रणालीलाई सहज बनाउने र जनशक्तिको क्षमता विकास गर्ने लगायतका पक्षहरुमा निरन्तर समन्वय रहने विषयमा छलफल भएको थियो।

यसैगरी बैठकका क्रममा गभर्नर पौडेल र पिपुल्स बैंक अफ चाइना (पीबीसी)का गभर्नर प्यान गोङशेङबीच भेटघाट भएको थियो। पीबीसीका गभर्नरसँगको भेटमा दुई केन्द्रीय बैंकबीच द्विपक्षीय सहयोग, बैंकिङ कारोबार एवं भुक्तानी प्रणालीलाई सहज र प्रभावकारी बनाउनका लागि निरन्तर सहकार्य गर्ने विषयमा छलफल भएको थियो।

गभर्नर पौडेलका साथ बैंक तथा वित्तीय संस्था नियमन विभागका निर्देशक गोविन्दप्रसाद नागिला र गभर्नरको कार्यालयका निर्देशक एवं सञ्चालक समितिका सचिव शरणकुमार अधिकारीको समेत सहभागिता रहेको थियो।