१४ माघ, २०८१काठमाडौं । नेपाल इन्फ्रास्ट्रक्चर बैंक (निफ्रा)ले दीर्घकालीन निक्षेपको ब्याजदर घटाएको छ।
निफ्राले एक सूचना निकाल्दै आज माघ १४ गतेबाट लागू हुने गरी दीर्घकालीन निक्षेपको ब्याजदर घटाएको हो। निफ्राले अब दीर्घकालीन निक्षेपमा व्यक्तिगततर्फ ४.५ प्रतिशत र संस्थागततर्फ ५.५ प्रतिशत ब्याजदर दिनेछ। यस्तो निक्षेप ५ वर्षदेखि १० वर्षसम्मको हुनुपर्नेछ।
यसअघि पुसमा निफ्राले दीर्घकालीन निक्षेपमा व्यक्तिगततर्फ ५.५ प्रतिशत र संस्थागततर्फ ६.५ प्रतिशत ब्याज दिएको थियो।
यसैगरी निफ्राले १० वर्षदेखि माथिको दीर्घकालीन निक्षेपमा व्यक्तिगततर्फ ५ र संस्थागततर्फ ६ प्रतिशत ब्याजदर निर्धारण गरेको छ। यी दुवै दीर्घकालीन निक्षेपमा संस्थागतले न्यूनतम ५ करोड रुपैयाँ र व्यक्तिले १ करोड रुपैयाँ राख्नुपर्ने निफ्राले जनाएको छ।
यसैगरी निफ्राले परियोजना कर्जा आधारदरमा ४ प्रतिशत प्रिमियम थपेर प्रवाह गर्ने भएको छ। निफ्राको आधारदर ७.०९ प्रतिशत रहेको छ।
ब्रिज ग्याप लोनको ब्याजदर भने परियोजना कर्जाको भन्दा ०.५ प्रतिशत बढी हुने निफ्राले जनाएको छ।
