काठमाडौं । एलआईसी नेपालले १ करोड रुपैयाँ बराबरको बीमा गराएको एक महिना अवधि नपुग्दै मृत्यु भएका एक बिमितको हकवालालाई बीमा दाबी भुक्तानी गरेको छ ।
एलआईसी नेपालमा बीमा गराएका सुवासचन्द्र गिरीको कोरोना भाइसर (कोभिड–१९) संक्रमणबाट निधन भएपछि दाबी भुक्तानी गरिएको कम्पनीले जानकारी दिएको छ ।
गिरी नवलपरासीका नेपाली काँग्रेसको जिल्ला सदस्यसमेत थिए । नवलपरासीमा ब्लक उद्योगका संचालन गिरी ३८ वर्षका थिए ।
गत साउन ४ गते एजेन्सी म्यानेजर प्रभा ज्ञवालीबाट गिरीको बीमा भएको थियो । एक करोड रुपैयाँ बराबरको बीमा गराएका गिरीको बीमा गरेको एक महिना नपुग्दै (२६ दिनमा नै) मृत्यु भएको थियो ।
बीमा गराउने बेला उनलाई कोरोना संक्रमण देखिएको थिएन । तर साउन अन्तिम सातामा उनलाई कोरोना संक्रमण पुष्टी भएको थियो । गत भदौ १ गते गिरीको निधन भएको कम्पनीले जानकारी दिएको छ । ‘नेपाली कांग्रेस र एलआईसी नेपालको संयुक्त आयोजनामा एक कार्यक्रम गरेर मृतक गिरीको हकवालालाई दाबी भुक्तानीको चेक प्रदान गरियो, बीमाप्रतिको सकारात्मक धारणा बृद्धि हुने भएकाले र नेपाली काँग्रेसले पनि औपचारिक कार्यक्रम गरौं भन्ने आशय व्यक्त गरेकाले यसरी चेक हस्तान्तरण गरिएको हो,’ एलआईसी नेपालको एजेन्सी म्यानेजर ज्ञवालीले भनिन् ।