२५ असोज, २०७७काठमाडौं । सिभिल लघुवित्त वित्तीय संस्थाले असोज २५ गतेदेखि अवितरित हकप्रद शेयर लिलामी प्रक्रियाबाट विक्री खुला गरेको छ । कम्पनीले साउन २५ गतेदेखि भदौ २९ गतेसम्म विक्री खुला गर्दा बिक्री हुन नसकेको संस्थापकतर्फको ११ हजार ६०८ र सर्वसाधारणतर्फको ८९ हजार ४५० कित्ता शेयर लिलामीमा विक्री खुला गरेको हो ।
यो शेयर खरिद गर्न चाहनेहरुले कात्तिक २ गतेभित्र गोप्य शिलबन्दी बोलपत्र पेश गर्न सक्नेछन् । शेयरको न्यूनतम मूल्य प्रति कित्ता १०० रुपैयाँ तोकिएकाले सो वा सोभन्दा बढी मूल्य अंकित गर्नुपर्नेछ । संस्थापक शेयरको हकमा न्यूनतम एक हजार कित्ता र सर्वसाधारणको हकमा न्यूनतम एक सय कित्ता र अधिकतमका लागि सम्पूर्ण कित्तासम्म माग गर्दै बोलपत्र पेश गर्न सक्नेछन् ।
कम्पनीको बिक्री प्रबन्धक सेञ्चुरी क्यापिटल मार्केट्स लिमिटेड रहेको छ । बोलपत्र आवेदन फारम विक्री प्रबन्धकसँगै सेञ्चुरी कमर्सियल बैंक लिमिटेडका विराटनगर, बीरगंज, पोखरा, बुटवल, नेपालगञ्ज, विरेन्द्रनगर, धनगढी, विर्तामोड, जनकपुर, हेटौडा, नारायणघाट, बाग्लुङ तथा महेन्द्रनगर कञ्चनपुरमा प्राप्त गर्न र बुझाउन सकिनेछ ।