काठमाडौं । तिहार नजिकिएसँगै राजधानी काठमाडौंका फूल तथा माला पसलमा किनमेल गर्नेहरूको चहलपहल बढेको छ।

तिहारमा विशेषगरी दिदीबहिनीले दाजुभाइलाई भाइटीकामा लगाइदिने माला तथा घर सजावटका लागि आवश्यक सयपत्री, गोदावरी र मखमलीलगायत फूल किन्ने उपभोक्ताको बजारमा चहलपहल बढेको हो।

काठमाडौं महानगरपालिकाले व्यवसायी र उपभोक्तालाई सहजताका लागि फूल तथा माला बिक्री गर्ने स्थानसमेत तोकिदिएको छ। महानगरले तोकेका क्षेत्रमा व्यवसायीले पसल राख्ने र उपभोक्ताले खरिद गर्ने गरिरहेका छन्।

यसैगरी, कमलादीस्थित आईटी बिल्डिङ, पुतलीसडकको स्टार मल, अनामनगरको भाटभटेनी, सुन्धाराको काठमाडौं मल, न्युप्लाजास्थित बज्र कम्प्लेक्स (गुड मार्ट), स्वयम्भूको धर्मचक्र पार्क, कलंकीको भाटभटेनी, नयाँ बजारको भ्याली कोल्ड स्टोर तथा माछापोखरीको बुद्ध मल र गुणस्तर खाल्डोलाई समेत स्वदेशी फूलमाला बिक्रीस्थलका रूपमा तोकिएको छ। महानगरले तोकेका यी स्थानबाट स्वदेशी फूल तथा माला बिक्रीवितरण भइरहेको छ। काठमाडौं महानगरले स्वदेशी फूल तथा माला बिक्रीलाई प्रवर्द्धन गरिरहेको छ।

तिहारको रौनक सुरु भएसँगै उपभोक्ता कोही माला किन्न व्यस्त देखिन्छन् भने कोही घर तथा पसल सजावटमा लागेका छन्। आइतबार लक्ष्मीपूजा भएकाले पनि यतिबेला घर सजावटको काम भइरहेको छ।