काठमाडौं । जीवन बीमक नेशनल लाइफ इन्स्योरेन्सले अभिकर्ताको मनोरञ्जनका लागि बृहद् सांगीतिक तथा मनोरञ्जनात्मक कार्यक्रम ‘गाला कन्सर्ट’ विथ डीजे नाइट्स आयोजना गर्ने भएको छ। अन्य बीमा कम्पनीले अभिकर्तालाई मनोरञ्जन गराउनका लागि विदेश भ्रमणमा लैजाने कार्यक्रम घोषणा गरिरहेका बेला नेशनल लाइफ इन्स्योरेन्सले स्वदेशमै कार्यक्रम आयोजना गर्न लागेको हो।

कम्पनीले विदेश भ्रमण कार्यक्रममार्फत विदेशी मुद्रा पलायन गर्नुको साटो मनोरञ्जनात्मक कार्यक्रममार्फत स्वदेशमै पैसा खर्चिने र स्वदेशी कलाकारलाई समेत प्रोत्साहन गर्ने उद्देश्य लिएको छ। बीमा कम्पनीले अभिकर्ताको मनोरञ्जनमार्फत प्रोत्साहन गर्नका लागि विशुद्ध सांगीतिक कार्यक्रम आयोजना गर्न लागेको यो सम्भवतः पहिलोपटक हो । यसअघि अन्य कम्पनीले अभिकर्ता सम्मान कार्यक्रमभित्रै सांगीतिक तथा मोटिभेसनल कार्यक्रम आयोजना गरे पनि विशुद्ध सांस्कृतिक कार्यक्रम मात्र आयोजना गरेका छैनन्।

कँडेलका अनुसार सोल्टी होटल परिसरमा आयोजना गर्न लागिएको कार्यक्रममा गीत, संगीत, नृत्य तथा हास्यव्यंग्यका माध्यमबाट राष्ट्रियस्तरका चारजना कलाकार र प्रसिद्ध डिजेसहितको टोलीले दर्शकलाई भरपूर मनोरञ्जन प्रदान गरिनेछ । कार्यक्रममा कलाकार प्रमोद खरेल, हेमन्त शर्मा, सन्दीप क्षेत्री, मेलिना राई र डीजे नानीको प्रस्तुति रहनेछ।