काठमाडौं । हिमालयन लघुवित्त वित्तीय संस्था लिमिटेडले चालु आर्थिक वर्षको तेस्रो त्रैमाससम्मको अपरिष्कृत वित्तीय विवरण प्रकाशित गरेको छ। चालु आर्थिक वर्षको चैत मसान्तसम्ममा लघुवित्तले १ करोड १३ लाख रुपैयाँ खुद नाफा कमाएको छ। गत आर्थिक वर्षको सोही अवधिको तुलनामा लघुवित्तको नाफा ७३.८७ प्रतिशतले बढी हो। गत आर्थिक वर्षको सोही अवधिसम्ममा लघुवित्तले ६५ लाख रुपैयाँ नाफा कमाएको थियो।

यस अवधिमा लघुवित्तको खुद ब्याज आम्दानी ४.४६ प्रतिशत बढेको छ । लघुवित्तको निष्क्रिय कर्जा यस अवधिमा ४.९१ प्रतिशतबाट घटेर ४.६१ प्रतिशतमा झरेको छ। लघुवित्तको सञ्चालन मुनाफा ७३.७२ प्रतिशतले बढेको देखिएको छ।

यस अवधिमा लघुवित्तको नाफासँगै प्रतिशेयर आम्दानी पनि बढेको छ। समिक्षा अवधिमा लघुवित्तको प्रतिशेयर आम्दानी २ रुपैयाँ २ पैसा बढेर ४ रुपैयाँ ७५ पैसा पुगेको छ। सो अवधिसम्ममा लघुवित्तको मूल्य आम्दानी अनुपात १५२।५८ गुणा रहेको छ भने प्रतिशेयर नेटवर्थ १२६.४६ गुणा रहेको छ।