काठमाडौं । बेष्ट फाइनान्स कम्पनी लिमिटेडको लिलामी शेयरमा आवेदन दिने आज अन्तिम दिन रहेको छ । कम्पनीले हकप्रद शेयर निष्काशनमा विक्री नभएको शेयर फागुन १ गतेदेखि लिलामीमा विक्री खुला गरेको हो । शेयर खरीद गर्न इच्छुक व्यक्ति, कम्पनी संस्थाहरूले आज सोमवार अर्थात् फागुन १५ गते बैकिङ समयसम्म आवेदन दिन सक्नेछन् ।
कम्पनीले संस्थापकतर्फको ५ लाख ५६ हजार ६७४ दशमलव ५७ कित्ता र सर्वसाधारतर्फको ५८ हजार ४२९ दशमलव ९० कित्ता गरी कुल ६ लाख १५ हजार १०४ दशमलव ४७ कित्ता शेयर लिलामीमा विक्री खुला गरेको हो । शेयरको न्यूनतम मूल्य १ सय रुपैयाँ तोकिएको हुँदा सो वा सोभन्दा बढी मूल्य अंकित गरी बोलपत्र पेस गर्न सक्ने कम्पनीले जनाएको छ ।
बोलपत्र पेस गर्दा संस्थापक शेयरको लागि न्यूनतम १००० कित्ता र सर्वसाधारण शेयरको लागि न्यूनतम १०० कित्ताका लागि आवेदन दिनुपर्नेछ । अधिकतममा भने सम्पूर्ण कित्ताका लागि पनि आवेदन दिन सकिने कम्पनीले जनाएको छ ।