काठमाडौं । आइएमई लाइफ इन्स्योरेन्स कम्पनीले संस्थापक शेयरधनीहरुलाई सत प्रतिशत पूँजी थप गर्ने समय थप गरेको छ । कम्पनीले कार्तिक एक गतेदेखि मंसिर ५ गतेसम्म सम्बन्धित शेयरधनीहरुलाई सत प्रतिशत पूँजी थप गर्न आह्वान गरेको थियो ।
यस अवधिमा चुनाव पनि परेको र माग बराबरको आवेदन नपरे पछि कम्पनीले पूँजी थप्ने म्याद मंसिर २० गतेसम्म थप गरेको हो । कम्पनीले गत असोज २६ गते सम्पन्न गरेको पाँचौ वार्षिक साधारणसभाबाट विद्यमान संस्थापकहरु सँग सत प्रतिशत पूँजी थप गर्ने निर्णय पारित गरेको थियो ।
अन्य कम्पनीहरु बीमा समितिले तोकेको पूँजी थप गर्न नसके पछि मर्जरमा गइरहदा नेपाल लाइफ भने विद्यमान संस्थापकहरु सँगै पूँजी थप गर्ने तयारीमा छ । कम्पनीको हालको चुक्ता पूँजी एक अर्ब ४० करोड रहेको छ । अहिलेको विद्यमान संस्थापकहरु सँग सत प्रतिशत पूँजी आह्वान पछि २ अर्ब ८० करोड पुग्नेछ । यस पछि कम्पनीले ३० प्रतिशत पूँजी आइपिओ जारी गरेर जुटाउनेछ । यदि मर्जरमै गए पनि कम्पनीलाई अर्को कम्पनी सँग मर्जरको लागि वार्गेनिङ पावर बढ्नेछ ।
यदि मर्जर नै नगरी पूँजी जुटाउन खोजेमा पहिला आइपिओ निष्काशन गर्ने र नपुग पूँजी बोनस शेयर दिएर जुटाउन सक्नेछ । बीमा प्राधिकरणले आइपिओ निष्काशन नगरेका कम्पनीहरुलाई जति पनि हकप्रद मार्फत पूँजी जुटाउन दिइरहेको छ । तर आइपिओ निष्काशन गरिसकेका कम्पनीहरुलाई पनि हकप्रद शेयर निष्काशन गर्न दिइरहेको छैन ।