८ चैत्र, २०७८काठमाडौं । बीमा अभिकर्ता तथा बीमा सर्भेयरले आफ्नो इजाजतपत्र ‘लाइसेन्स’ आजदेखि अनलाइन प्रणालीबाटै नविकरण गर्न पाउने भएका छन् । नविकरणका लागि बीमा समितिमा धाउने पर्ने बाध्यतालाई अन्त्य गर्दै बीमा समितिका अध्यक्ष सूर्य प्रसाद सिलवालले बीमा सर्भेयर तथा बीमा अभिकर्ताको इजाजतपत्र डिजिटल माध्यमबाट नविकरण गर्ने मिल्ने सफ्टवेयरको शुभारम्भ गरेका हुन् ।
सर्भेयर एसोसियएनका अध्यक्ष मोहन पुरुष ढकालले बीमा समितिले निर्माण गरेको यस सफ्टवेयरले सर्भेयरको नविकरणका लागि सहज भएको भन्दै सफलताको शुभकामना व्यक्त गरेका छन् । बीमा समितिले यस भन्दा अगाडी पनि लाइसेन्स नविकरण गर्न मिल्ने सफ्टवेयर निर्माण गरेर असफल भएको भन्दै पहिलाको जस्तो नहोस भन्दै विशेष चनाखो हुन समेत उनले आग्रह गरे ।
भुक्तानी सेवा प्रदायक संस्था कनेक्ट आइपिएसका प्रमुख कार्यकारी अधिकृत निलेस मान सिंह प्रधानले भुक्तानी प्रणालीलाई सहज बनाउन बीमा समितिले अभिकर्ता तथा सर्भेयरहरुमा यस सम्बन्धी धेरै भन्दा धेरै जनचेतनाको काम गर्नु पर्ने बताए । यस प्रविधिलाई प्रयोग गर्न सक्ने बनाउनका लागि अभिकर्ताहरुलाई यसको तरिकाहरु सम्बन्धी जानकारी दिनु पर्ने भन्दै उनले विभिन्न माध्यमबाट जानकारी प्रदान गर्न समेत अनुरोध गरेका छन् ।
अभिकर्ता तथा सर्भेयरले कनेक्ट आइपिएसको भुक्तानी प्रणालीमा गएर नविकरण शुल्क तिर्ने व्यवस्था मिलाइएको छ । जसमा अभिकर्ताले भुक्तानी गरेको नविकरण शुल्कको जानकारी सिधै बीमा समितिको सफ्टवेयरमा हुने र सफ्टवेयरले नै स्वचालित रुपमा नविकरण भएको जानकारी दिने व्यवस्था गरिएको छ ।
