८ वैशाख, २०८१काठमाडौं । एशियन लाइफ इन्स्योरेन्स कम्पनी लिमिटेड अत्तरिया उपशाखाले घातक रोग वापत बीमितलाई २० लाख रकमको चेक हस्तान्तरण गरेको छ । शनिबार गोदावरी नगरपालिका अत्तरिया उपशाखाले कार्यक्रमको आयोजना गरी घातक रोग दावी भुक्तानी वापत २० लाख बीमाङ्क बराबर रकमको चेक हस्तान्तरण गरेको हो ।
गोदावरी नगरपालिका वडा नं १ अत्तरिया निवासी बीमित नरबहादुर राईलाई २० लाख बीमाङ्क बराबर रकमको चेक हस्तान्तरण गरेको छ ।
उक्त चेक बिमित राईलाई उनकै घर अगाडि सृजनशिल युवा क्लवको खेलमैदानमा कम्पनीले आयोजना गरिएको कार्यक्रममा एशियन लाइफ इन्स्योरेन्स कम्पनी लिमिटेड सुदूरपश्चिम प्रदेशका प्रमुख गणेशबहादुर साउँद र अत्तरिया उपशाखा कार्यालय प्रमुख डम्मराकुमारी दियाकोटीले संयुक्त रूपमा हस्तान्तरण गरेका हुन् ।
यस्तै एशियन लाइफ इन्स्योरेन्स कम्पनी लिमिटेडका बरिष्ठ अभिकर्ता अत्तरिया निवासी डल्लुराना मगर मार्फत करिब साढे तिन वर्ष अघि बीमित नरबहादुर राईले बीमा गरेको साथै राईलाई बीमा लाभ रकम २० लाखको क्रिटिकल केयर दावी भुक्तानी अन्तर्गत उक्त चेक हस्तान्तरण गरिएको कम्पनीले जनाएको छ ।