काठमाडौं । आइएमई पेले विदेशमा कोरोना भाइरसको संक्रमणमा परेर मृत्यु भएका परिवारलाई ३९ लाख ५० हजार रुपैयाँ आर्थिक सहयोग गरेको छ । आइएमई पेले शुक्रबार एक कार्यक्रमको आयोजना गरी कोरोना भाइरसको कारण मृत्यु भएका परिवारलाई जनही ५० हजार रुपैयाँको चेक हस्तान्तरण गरेको हो ।
कोरोना भाइरसको कारण विदेशमा मृत्यु भएका श्रमिकहरुका आफन्तहरुलाई सहयोग गर्ने उद्देश्यले आइएमई भरोशा कोषको रकम हस्तान्तरण गरेको बताएको हो ।
आइएमईपेले ७९ जना पीडित परिवारलाई जनही ५० हजार रुपैयाँको चेक हस्तान्तरण गरेको हो । शुक्रबार राजधानीमा आयोजित कार्यक्रममा आइएमई ग्रुपका अध्यक्ष तथा नेपाल उद्योग वाणिज्य महासंघका वरिष्ठ उपाध्यक्ष चन्द्रप्रसाद ढकालले पीडितहरुलाई चेक हस्तान्तरण गरेका हुन् । ढकालले चेक हस्तान्तरण कार्यक्रममा बोल्दै पीडित परिवारको घाउमा मल्हम लगाउने उद्देश्यले सानै भए पनि सो रकम सहयोग गरेको बताए । ‘म आफै पनि कोरोना संक्रमित भएँ, कोरोना भाइरस संक्रमित र संक्रमितका परिवारलाई हुने पीडा मैले आफैले महसुस गरेको छु, हामीले हाम्रो संस्थाको संस्थागत सामाजिक उत्तरदायित्वअन्तर्गत यो रकम सहयोग गरेका छौं, यसले थोरै भए पनि पीडितको घाउमा मल्हम लाग्छ,’ ढकाले भने । यस्तै, कार्यक्रममा आइएमई पेका प्रबन्ध निर्देशक हेमराज ढकालले निजी क्षेत्रबाट स्थापित यस कोषले प्रभावित परिवारलाई केही न केही सहयोग पुग्ने उल्लेख गर्दै देश र आफ्नो समाज छाडेर परिवारको लालनपालनका लागि विदेशमा गएका श्रमिकको निधन हुनु धेरै दुःखद भएको भन्दै पीडित परिवारहरुलाई सहयोग गरेको बताए । ‘हामी सबैले एकअर्कालाई सहयोग गर्ने बानी बसालौं, यो एउटा हाम्रो सुरुवाती मात्र हो, भोलि हामी जस्तै धेरै संस्थाहरुले पनि यस्तो अभ्यास गरुन् भन्ने हाम्रो सोच हो,’ उनले बताए । यस्तै, आइएमई पेका प्रमुख कार्यकारी अधिकृत पोखरेलले पनि भरोशा कोष स्थापनाको उद्देश्यमाथि प्रकाश पारे । उनले संस्थाको उद्देश्य नाफा हेर्ने मात्र नभई संस्थागत सामाजिक उत्तरदायित्व पनि भएकाले तयसको उद्देश्य र पीडित परिवारहरुको घाउमा मल्हम लगाउने प्रयास आफुहरुले गरेको बताए । कार्यक्रममा आईएमईपेका ब्राण्ड एम्बास्डर दिपकराज गिरी र दिपाश्री निरौला पनि उपस्थित थिए ।