काठमाडौं । कामना सेवा विकास बैंकले गत आर्थिक वर्षको लाभांश घोषणा गरेको छ । बैंकले आर्थिक वर्ष २०७७/७८ को नाफाबाट चुक्ता पुँजीको १९.४७ प्रतिशत लाभांश वितरण गर्ने घोषणा गरेको हो ।
असोज ७ गते बसेको कम्पनी सञ्चालक समितिको बैठकले चुक्ता पुँजीको १८.५० प्रतिशत बोनस र कर प्रयोजनका लागि ०.९७ प्रतिशत नगद लाभांशसमेत गरी १९.४७ प्रतिशत लाभांश वितरण गर्ने प्रस्ताव गरेको हो ।
उक्त प्रस्तावलाई नेपाल राष्ट्र बैंकले स्वीकृति तथा बैंकको आगामी साधारणसभाले पारित गरेपछि मात्रै सेयरधनीले सो मात्राको लाभांश पाउने छन् ।
प्रस्तावित १९.४७ प्रतिशत लाभांश गत ४ वर्षयताकै उच्च हो । विकास बैंकले सेयरधनीलाई आर्थिक वर्ष २०७३/७४ मा १२ प्रतिशत, आर्थिक वर्ष २०७४/७५ मा ९.५, आर्थिक वर्ष २०७५/७६ मा ६.८ प्रतिशत र आर्थिक वर्ष २०७६/७७ मा ४.६३ प्रतिशत लाभांश वितरण गरेको थियो ।
हाल बैंकको चुक्ता पुँजी २ अर्ब ६५ करोड रुपैयाँ रहेको छ । १८.५ प्रतिशत बोनस सेयरपछि बैंकको चुक्ता पुँजी ३ अर्ब १४ करोड रुपैयाँ नाघ्ने छ ।