काठमाडौं । प्राइफ लाइफ इन्स्योरेन्स कम्पनीको मुनाफा १० प्रतिशतले घटेको छ । कम्पनीले चालु आर्थिक वर्षको दोस्रो त्रैमाशिक अवधिमा १७ करोड ४२ लाख रुपैयाँ मुनाफा आर्जन गरेको छ । गत वर्षको दोस्रो त्रैमाशिक अवधिमा भने १९ करोड ३६ लाख रुपैयाँ थियो । कम्पनीले समिक्षा अवधिमा नोक्सानी बापत एक करोड ३४ लाख रुपैयाँ व्यवस्था गरेकाले पनि मुनाफामा गिरावट देखिएको हो ।
खुद बीमा शुल्क आर्जन भने १५ प्रतिशतले बृद्धि भएको छ । समिक्षा अवधिमा कम्पनीले २ अर्ब ३२ करोड रुपैयाँ खुद बीमा शुल्क आर्जन गरेको छ ।
कम्पनीको अभिकर्ता कमिशन भने घटेको छ । गत वर्ष अभिकर्ताहरुलाई २३ करोड २ लाख रुपैयाँ कमिशन दिएको प्राइमले यस वर्ष भने २२ करोड ५५ लाख रुपैयाँ मात्रै भुक्तानी गरेको छ । कम्पनीको प्रथम बीमा शुल्क आर्जनमा आएको गिरावट सँगै कमिशन घटेको हो ।
दाबी भुक्तानी भने बढेको छ । कम्पनीले समिक्षा अवधिमा मात्रै ५६ करोड ४ लाख रुपैयाँ दाबी भुक्तानी गरेको छ । जवकी गत वर्ष ४९ करोड ६१ लाख रुपैयाँ मात्रै थियो ।
कम्पनीको कुल बीमा शुल्क आर्जन हेर्ने हो भने २ अर्ब २३ करोड रुपैयाँ छ । हालसम्मकै कुल बीमा शुल्क आर्जन भने २४ अर्ब ८३ करोड रुपैयाँ छ । हाल कायम रहेको बीमा लेख संख्या २ लाख एक हजार छ । तर गत वर्ष २ लाख ५४ हजार वटा थियो ।
चुक्ता पूँजी २ अर्ब ७७ करोड रुपैयाँ रहेको कम्पनीको प्रतिशेयर आम्दानी भने १२ रुपैयाँ छ । जगेडा कोषमा ४९ करोड १७ लाख रुपैयाँ छ । जीवन बीमा कोषमा भने १६ अर्ब ६१ करोड रुपैयाँ जम्मा गरेको छ । गत वर्षको यहि अवधिमा भने १३ अर्ब ९ करोड रुपैयाँ मात्रै थियो ।